Estaba a pensar en facer un webinar automatizado (tradución, un vídeo) onde che explicaría paso a paso como xerar ingresos en piloto automático grazas a un curso high ticket (moi caro), que cho ía endosar cando estiveses funelizado (cando me gañase a túa confianza, vaia).

Non se me alporicen os marketers, que é unha brincadeira.

Pareceume máis interesante contarche de balde a miña experiencia intentando monetizar proxectos dixitais e como case todo foi mal.

Admítoo.

Aínda non teño 7 cifras na miña conta bancaria e non me fixen rico grazas ao dropshipping, nin viaxei a Sillicon Valley.

Pola contra, esnafreime un feixe de veces desde o PC da miña casa e ocorréronseme ideas tolísimas que logo nin se chegaron a executar.

Se cadra viñeches aquí a por respostas certeiras; se é así, podes marchar, porque este artigo non é para ti. De feito, non che vou recomendar nada.

Mais se o que queres é coñecer a miña experiencia, gustaríame que ficases.

E se ti tamén tes algo a contarnos, déixao nos comentarios para que poidamos aprender uns dos outros.

O meu proxecto dixital, a venda de servizos

Non che descubro nada se che digo que actualmente me dedico como principal actividade á venda de servizos de deseño web para emprendedores que precisan unha páxina optimizada e profesional que impulse o seu negocio.

Aínda que realmente estou a facer un pequeno pivote para poder segmentar e concretar mellor o servizo que darei ao meu (novo) cliente obxectivo.

Non che chamou a atención de que van todos os meus artigos ultimamente? Mais iso será algo do que falarei noutro momento.

Para chegar a concretar o meu cliente ideal e a miña oferta de servizos, tiven que realizar unha serie de accións e estudos que eran completamente alleos a min; neste sentido, debo agradecer a moita axuda que me prestou a Fundación Ronsel.

Estudo de mercado

Para poder testar se a miña idea tiña ou non aceptación entre os que pensaba que eran os meus clientes potenciais, tiven que realizar un estudo de mercado.

Basicamente, con iso quería demostrar se a miña oferta era o que precisaban para melloraren os seus negocios ou, pola contra, caera no erro tan común de pensar que a miña idea e as miñas necesidades eran as mesmas que as do meu público.

É moi común levar adiante proxectos sen contrastalos, o que pode botar por terra esas iniciativas. Ademais, esta investigación é fundamental para logo ser quen de realizar un plan de márketing.

Creo que algunhas claves para levar a cabo un bo estudo de mercado son lóxicas, outras terás que estudalas con coidado, coa axuda de guías ou profesionais. Déixoche algunhas sobre as que reflexionei:

• A onde queres chegar? Define a túa meta, o teu obxectivo. A onde queres chegar, que queres investigar, para que vai servir.
• Investiga e analiza. Adopta unha metodoloxía e investiga. Fala co teu cliente e tamén coa túa competencia. Non abonda só con preguntarlle aos teus amigos ou parella.
• Contrasta a idea. Grazas a este estudo podes contrastar a túa idea e mesmo mudala ou mellorala para adaptala ás necesidades reais.
• Como recollo información? A través da procura, observación, entrevistas, enquisas, análises de competencia etc. No meu caso, foron fundamentalmente 3: análise de competencia, enquisas a potenciais clientes e observación.

Definición do modelo de negocio

Para min, un modelo de negocio non é outra cousa que a definición e descrición razoada do que ofrezo para solucionar un problema. A quen llo estou a solucionar, é dicir, quen estou a achega un valor. Como o fago e como gaño a vida con iso.

Sei que non é unha definición á altura das que dan no grao de ADE, mais a min chégame. Definir produto/servizo. Definir cliente. Definir a estrutura. Estudar a viabilidade económica.

Para todo isto, botei man da metodoloxía Canvas, que tan de moda se puxo nos últimos anos.

O Modelo Canvas permíteche plasmar a túa idea de xeito esquemático e visual os puntos máis importantes do teu proxecto. A salientar dúas partes sobre as demais:

• O segmento de clientes. Determina o segmento, o nicho de mercado onde estás a crear valor. Cítoo, e fágoo no primeiro lugar, porque creo que é a parte máis destacada. Sen clientes non hai negocio.
• A proposta de valor. Que problemas solucionas ao segmento de clientes que escolliches. En que vas mellorar as súas vidas.

Definición do cliente ideal (buyer persona)

Este concepto gústame moito e creo que é o máis difícil de todos.

Unha vez realizado o Canvas e tendo todos os datos xa postos de maneira visual, cómpre entrar ao detalle. Fiar fino.

E para iso definimos o noso cliente ideal de forma moito máis profunda, o que se coñece en márketing dixital como buyer persona. É dicir, é o modelo de cliente que comprará o teu produto ou servizo.

O primeiro que debes descubrir é o seu punto de dor; ou sexa, a preocupación ou necesidade que ten o teu cliente e que será solucionada grazas ao noso produto ou servizo. Atacar o seu punto de dor é fundamental na estratexia de vendas.

Póñoche un exemplo.

Eu sei que un dos puntos de dor dalgúns dos meus clientes de tendas online son as comisións que lles cobran as plataformas externas por comercializar os seus produtos. Para outros, o seu punto de dor é que a súa competencia está a vender online e eles non, polo que están a quedar sen a súa porción de mercado.

Eu, sabendo iso, podo optimizar moito mellor o meu servizo e as miñas mensaxes.

Alén disto, é moi interesante facer unha descrición clara e concisa da persoa: ponlle nome, lista as súas afeccións, como é a súa vida, a que dedica o seu tempo libre, en que traballou, o que a motiva, o que a pon triste, de que te coñece etc.

Definición da estratexia dixital

Falar da estratexia dixital que cadaquén pode aplicar ou aplica no seu proxecto daría para moitísimo, a verdade. E hai moitas posibilidades a elixir que encaixan mellor nunhas situacións que noutras.

Dependerá do servizo que ofrezas e do teu cliente obxectivo. Existen expertos e consultores que con certeza te axudarán a definir a túa.

No meu caso, estou a basear toda ela en tres puntos clave:

• Contidos. Definín que tipo de contidos publico nos diferentes canais para obter presenza e visibilidade. Calendaricei cando e como publico en cada un deles (excepto Twitter, ao que lle dou un uso máis intensivo). Cada contido debe ter un obxectivo e un público, non pode ser aleatorio, debe estar adaptado ao canal… Mais nisto xa se sabe, do dito ao feito vai un bo treito. Non cumprín case ningún dos calendarios.
• SEO. Ben, talvez afirmar que teño unha estratexia SEO sexan palabras maiores, porque é unha contorna enorme e complicada. Eu realmente baséome en escribir (cun estudo previo de palabras clave) de maneira periódica, atacando tendencias de busca concretas, que teñan relación co deseño web e que poidan responder a dúbidas do meu cliente obxectivo. Intento optimizar meta título e meta descrición, ligazóns permanentes, título, imaxes etc. Mais fallo en toda a parte de ligazóns (internas e externas), entre outras cousas. Contratar un profesional neste punto talvez me/che veña ben.
• E-mail márketing. Fun construíndo unha lista de subscritores cos que teño un contacto semanal e intento achegarlles algo de valor. Creo que debería profundar máis este campo.

O principal problema de vender servizos

Os que vendemos servizos temos moitos problemas, mais o principal é que non é unha actividade escalábel.

A nosa capacidade de xerar uns ingresos mínimos baséase simplemente nas horas que lle podemos dedicar. Se lle dedicamos 40 horas semanais, poderemos facer até un punto, se lle dedicamos 50 horas, até outro punto. Se lle dedicamos 30, até outro.

É bastante escravo, e sempre estará limitado.

Sen contar a incerteza da procura de clientes, sobre todo nos primeiros meses ou anos, cando aínda non estás posicionado en Google.

Por iso, e para intentar non depender só das horas que estivese disposto a botarlle, fun probando diferentes estratexias.

Direiche algunhas que están implementadas directamente nesta páxina web e outras fixéronse en proxectos paralelos.

Venda de produtos a través dunha tenda online

A primeira foi utilizar unhas redes sociais con bastantes seguidores e gustos comúns, para probar a vender camisetas de temática relacionada.

Isto como test para poder abrir un marketplace máis grande.

Para iso, deseñei unha landing page con varias propostas, onde a xente puidese ir reservando unha delas co tamaño preferido a cambio dun desconto na compra.

Isto tiña dous obxectivos. Por un lado, coñecer cal era o deseño que máis gustaba, aínda antes de facer ningunha camiseta. Por outro lado, asegurarme de que ía imprimir as axeitadas para cada deseño.

Por que facer moitas dun deseño se ninguén a quería comprar?

Unha vez pechei a promoción de reserva, tiña claro cal era (por moita diferenza) a camiseta máis demandada e cantos tamaños había reservados de cada unha.

Montei unha tenda online con WordPress e WooCommerce, configureina o mellor que puiden e instalei as pasarelas de pagamento automáticas. Todo isto vímolo en varios artigos deste blog.

As persoas que reservaran o seu deseño preferido a cambio do desconto resulta que fallaron á hora de realizaren a compra… E a máis reservada foi a menos comprada !!

Conclusión: aínda teño camisetas sen vender almacenadas pola casa.

Afiliación ou márketing de afiliados

O márketing de afiliados, ou afiliación, é unha estratexia para conseguir ingresos recorrentes de maneira pasiva, mediante a promoción de produtos doutras compañías.

No momento en que unha persoa compra ese produto a través de ti, a través da túa referencia, levas unha comisión previamente acordada.

O seu funcionamento non é complicado. O vendedor darache un link único e persoal que te identifique como responsábel desa venda.

Eu creo que é un win-win, unha relación onde ambos gañan.

Gaña o afiliado ao ser capaz de xerar ingresos de maneira pasiva ao promocionar produtos de terceiros, sen ter que lanzalos ou vendelos el directamente.

Tamén gaña o vendedor, pois vai chegar a un maior número de persoas e máis xente (os afiliados) estarán recomendando os seus servizos.

Eu mesmo teño ligazóns de afiliado nesta páxina web. Por exemplo, se mercas un hosting en Raiola Networks ou en Dinahosting a través das miñas ligazóns, levarei unha comisión. Se compras a versión premium de GeneratePress, tamén. Ou se compras Crocoblock, pois tamén.

Iso significa que os promocione só porque son afiliado?

Para nada. Creo que na afiliación é fundamental xerar confianza e no meu caso só son afiliado de produtos ou servizos que eu mesmo emprego.

De feito, direiche que o puzzle da afiliación encaixa se os artigos máis visitados da túa web conteñen ese tipo de ligazóns. Por exemplo, o artigo máis visitado deste blog é a guía paso a paso de GeneratePress.

Saco unha diñeirada coas afiliacións? Pois non, aínda non. Mais agardo ir aumentando, segundo o meu blog vaia medrando e recibindo visitas.

Curso online

Outra boa estratexia a priori, que foi tendencia hai algún tempo, é o lanzamento de cursos de formación sobre cuestións específicas.

Eu recoñezo que hai un par de anos comprei algún curso online relacionado co deseño web, porque o valor percibido polos mesmos era moi alto. E a verdade é que non me defraudaron.

Nesta estratexia valoro moi positivamente a escalabilidade e a venda masiva dun produto que foi creado unha vez. Mais o seu éxito radica nunha moi boa segmentación do cliente ao que te dirixes, coñecer á perfección os seus puntos de dor e a percepción do valor que ese cliente faga.

Ademais, na miña opinión é interesante andar ese camiño previamente.

É dicir, o camiño é máis fácil se, por exemplo, tes unha lista de subscritores que confían en ti, aos que lles estiveches achegando valor e sobre os que facer e-mail márketing.

Ou tes un blog ben posicionado e unha reputación online. Ou mesmo podes combinar o lanzamento do teu curso cun programa de afiliados, o que implica que terceiras persoas promocionen ese curso por ti a cambio dunha comisión por venda.

Eu intenteino co meu amigo Iago Fraga, experto en produtividade persoal, e foi unha experiencia moi boa. Con todo, fallounos a fase de comercialización e o noso prototipo de curso nunca foi rendíbel.

Infoproduto ou produto dixital

Un infoproduto, ou produto dixital, é un produto formativo que non ten soporte físico e que se distribúe a través de Internet.

Si, a ver, xa sei o que estás a pensar.

Antes faleiche dun curso e, segundo a definición que acabo de dar, un curso é un infoproduto. Estás no certo, mais eu separeinos porque quería destacar o curso en concreto.

Voltando aos infoprodutos en xeral, estes poderían ser un ebook, unha guía en PDF, unha masterclass, un curso en audio, un curso en vídeo etc.

A principal vantaxe dos infoprodutos é a posibilidade de automatizar as vendas e xerar ingresos pasivos unha vez montado todo o sistema. Non precisas ir porta a porta, ou chamada a chamada.

Esa sexa talvez a principal, pero ten máis. Podes impactar un gran número de persoas mediante anuncios e a distribución deste produto non entende de alfándegas ou aranceis.

É ideal para achegar coñecementos e algúns son fáciles de crear, porque calquera persoa con experiencia e coñecementos dunha profesión pode crear un infoproduto relacionado con ela.

Creo que o máis difícil de vender un infoproduto é promocionalo e engadirlle moita percepción de valor.

Até o momento, eu creei dous infoprodutos: un ebook e unha masterclass, que estratexicamente os estou a empregar de lead magnet. É dicir, de gancho para conseguir máis subscritores á miña lista de correo.

Artigos patrocinados

Se tes un blog con moito tránsito, podes xerar algo de diñeiro coa publicación de artigos. Simplemente debes establecer canto custa a publicación no mesmo, dependendo da visibilidade, da comunidade do blog, do número de visitas ao mes, da temática, da autoridade que teña o dominio etc.

Eu participo na xestión dun blog (de temática offline) onde se cobra entre 50€ e 100€ por cada post patrocinado (realmente neste caso funcionan case como publi-reportaxes).

Existe unha chea de plataformas que te axudarán a vender (ou comprar) espazos de artigos patrocinados na túa web ou blog.

Conclusión

Aquí che queda a miña experiencia intentando monetizar proxectos dixitais.

Direiche que, por agora, as únicas que me saíron relativamente ben son a venda directa de servizos e a afiliación.

Non descarto volver a intentar un lanzamento dun curso, especialmente coa situación actual que estamos a vivir.

Tamén sei que quedan algúns outros modelos por explorar: a membresía, a publicidade con Adsense ou semellante (aínda que polo que vin, cada vez é menos rendíbel) ou outro tipo de infoprodutos.

Xa ves, oxalá nun par de anos poida editar este artigo contándoche máis.

Mais agora gustaríame coñecer a túa experiencia. Cóntasma?